Gwamnatin jihar Gombe ta yi kira ga jami’o’i da sauran manyan makarantun gaba da sakandare da su ƙara taka rawar gani wajen magance matsalolin al’ummomin da suke ciki tare da tallafa wa gwamnati ta hanyar bincike da kirkire-kirkire.
Mataimakin Gwamnan jihar Gombe, Manassah Daniel Jatau, ne ya bayyana hakan yayin da ya karɓi tawagar shugabannin Jewel University ƙarƙashin jagorancin Mataimakin Shugaban Jami’ar, Yahya Ibrahim Yero, a ziyarar girmamawa da suka kai masa.
Dr. Jatau ya ce ya kamata jami’o’i su gina haɗin gwiwa na dabaru domin samun ɗorewar kuɗaɗen gudanarwa, su tabbatar da ingancin ilimi, sannan su yi amfani da kafafen yaɗa labarai wajen bayyana shirye-shiryensu da nasarorin da suke samu. Ya ƙara da cewa babu wata jami’a da za ta bunƙasa idan ta ware kanta daga al’ummar da take ciki.
Ya kuma bayyana cewa jihar Gombe yanzu tana da jami’o’i biyar, lamarin da ya ce babban ci gaba ne a fannin ilimi. Haka kuma ya buƙaci jami’ar ta haɗa kai da gwamnatin jihar wajen fuskantar matsalolin tsaro.
Mataimakin gwamnan ya kuma bayyana cewa ana shirin gudanar da bukukuwan cika shekaru 30 da ƙirƙirar Jihar Gombe, inda ya gayyaci jami’ar da ta ba da gudummawa ta hanyar bincike da shawarwarin masana domin tabbatar da nasarar bikin.
Dr. Jatau ya tabbatar wa jami’ar da ci gaba da samun goyon bayan gwamnatin jihar, tare da ƙarfafa gwiwar shugabanninta su ci gaba da tuntuɓar gwamnati idan akwai buƙatar taimako a hukumance.
Tun da farko, Mataimakin Shugaban Jewel University, Farfesa Yahya Ibrahim Yero, ya ce manufar ziyarar ita ce ƙarfafa haɗin gwiwa da gwamnatin jihar.
Ya bayyana cewa jami’ar na gudanar da shirye-shiryen karatu guda 25 da National Universities Commission ta amince da su.
Haka kuma ya bayyana cewa wanda ya kafa jami’ar ya samar da guraben karatu ga ɗalibai marasa galihu, musamman ‘yan asalin Jihar Gombe da sauran ɗaliban yankin Arewa maso Gabas.
Farfesa Yero ya sake jaddada kudirin jami’ar na samar da waɗanda suka kammala karatu masu ilimi, ƙwarewa da kyawawan ɗabi’u domin ba da gudummawa ga ci gaban ƙasa.
