Rundunar ’Yan Sandan jihar Gombe ta kama wasu mutane biyu da ake zargi da hannu a cikin wani hari da ya yi sanadin mutuwar matar wani jami’in ’yan sanda a unguwar Wuro Shie da ke cikin birnin Gombe.
Lamarin ya faru ne da misalin ƙarfe 4:35 na asubahin ranar Asabar, 26 ga Satumba, 2026, lokacin da wasu mutane da har yanzu ba a tantance adadinsu ba, dauke da adduna da makamantansu, suka kutsa cikin gidan Inspector Salisu Waziri, wanda ke aiki da rundunar Safer Highway Patrol.
A cewar ’yan sanda, maharan sun yi yunkurin kwace wayar salula daga hannun matar jami’in, Mrs. Aishatu Salisu.
Rahoton ya ce matar ta yi ƙara domin neman agaji, lamarin da ya sa ɗaya daga cikin maharan ya kai mata hari tare da caka mata adda, kafin su tsere daga wurin.
An ce maharan sun bar wayar salular matar a wurin bayan sun tsere.
Bayan samun rahoton, jami’an rundunar sintiri na sashen ’yan sanda na Pantami sun gaggauta isa wurin da lamarin ya faru, inda suka garzaya da matar zuwa Asibitin Koyarwa na Tarayya da ke Gombe domin ba ta agajin gaggawa. Sai dai, likitoci sun tabbatar da cewa ta rasu.
Bayan faruwar lamarin, Rundunar ’Yan Sandan Gombe ta fara gudanar da bincike tare da ƙara kaimi wajen gano mutanen da ake zargi da hannu a harin.
A sakamakon binciken, jami’an ’yan sanda sun kama mutane biyu da ake zargi da hannu a lamarin.
Waɗanda aka kama sun hada da Muhammad Bashir Sale, wanda aka fi sani da “Full”, mai shekaru 20, da Musa Sale Ahmad, wanda aka fi sani da “Abba”, mai shekaru 18.
Rundunar ta ce dukkan mutanen biyu mazauna unguwar Wuro Shie ne a Gombe.
A yayin binciken farko, ’yan sanda sun ce waɗanda ake zargin sun amsa cewa suna da hannu a cikin laifin.
Haka kuma, rundunar ta ce an kwato wata wuka mai kaifi wadda aka ajiye a matsayin shaida domin taimakawa wajen gudanar da binciken.
A halin yanzu, ana ci gaba da gudanar da bincike kan lamarin a Sashen Binciken Manyan Laifuka na Jihar Gombe, wato State CID.
Kwamishinan ’Yan Sandan jihar Gombe, CP Umar Ahmed Chuso, ya bayar da umarnin gudanar da cikakken bincike cikin sirri domin tabbatar da cewa duk wanda aka samu da hannu a laifin ya fuskanci hukuncin da ya dace.
Rundunar ta kuma tabbatar wa al’ummar jihar cewa za ta ci gaba da daukar matakan kare rayuka da dukiyoyin jama’a tare da ƙara ƙaimi wajen yaki da miyagun laifuka a fadin jihar.
Ta bukaci jama’a da su kasance masu taka-tsantsan tare da gaggauta sanar da jami’an tsaro duk wani mutum, motsi ko wani abu da suka ga yana da nasaba da laifi.
Rundunar ta ce za ta sanar da jama’a duk wani sabon ci gaba da aka samu dangane da binciken.
