Yanzu yaki tsakanin Amurka, Isra’ila da Iran ya shiga mako na uku, ba tare da wata alama karara ta tsagaita shi ba, abinda yayi sanadiyyar rufe mashigin ruwa na Hormuz, inda ta nan ne ake jigilar Kashi 20 cikin 100 na man fetur da gas na duniya. Wannan yasa farashin man fetur da sauran makamashi ya tashi, kuma ana fargaban hakan Zai iya jawo hauhawar farashin kayayyaki a duk fadin duniya.
Isra’ila tace a ranar Litinin ta yi tsararren shiri na ci gaba da fafata yaki har zuwa nan da mako uku, yayin da take ci gaba da kaiwa Iran hari. Ita kuma Iran ta kai hari da jirage marasa matuki na drone da ya sa aka rufe filin jirgin sama na Dubai na wani dan lokaci, sannan kuma harin ya shafi wata babbar cibiyar man fetur a Hadaddiyar Daular Larabawa.
A ranar Lahadi, shugaban Amurka, Donald Trump yayi kira ga kasashe su kawo dauki don a bude mashigin ruwa na Hormuz, kuma yace kungiyar NATO nan gaba zata fuskanci mummunan yanayi, idan bata taimaka ba. Amma ‘yan kawancen Amurka suna so a bi hanyar diplomasiyya wajen bude mashigin ruwan, suna dari darin shiga yaki.
