Darakta Janar na Hukumar Hadakar Ayyuka a jihar Gombe, Builder Mahmood Yusuf, ya fara rabon kayan tallafi ga al’ummar Ƙaramar Hukumar Akko ta Jihar Gombe.
Da yake magana yayin rabon kayan, Builder Mahmood Yusuf (Tauraron Akko) ya bayyana shirin a matsayin wani bangare na ribar dimokuraɗiyya da gwamnatin Gwamnan jihar Gombe, Muhammadu Inuwa Yahaya, ke samarwa al’umma.
Ya ce shirin tallafin ya kuma kasance wata hanya ta nuna goyon bayansa ga Gwamna Inuwa Yahaya da sauran ’yan takarar da jam’iyyar (APC) ta tsayar, tare da jaddada kudirin jam’iyyar na inganta walwala da tattalin arzikin al’umma.
Shi ma da yake jawabi, Mana Jan Yankin na Hukumar Upper Benue Dadinkowa a jihar Gombe, Sarkin Shanun Yamaltu Alhaji Dr. Abubakar Muhammad Bello ya yaba wa Builder Mahmood Yusuf bisa wannan shiri, yana mai bayyana tallafin a matsayin matakin da ya zo a kan lokaci kuma zai yi matukar tasiri ga rayuwar wadanda suka amfana.
Ya ce wannan karamcin ba wai kawai zai taimaka wajen inganta rayuwar masu cin gajiyarsa ba ne, har ma zai taimaka wajen karfafa goyon bayan jam’iyyar APC daga matakin al’umma zuwa matakin jiha.
Wasu daga cikin wadanda suka amfana sun bayyana godiyarsu ga Builder Mahmood Yusuf, inda suka ce kayan da suka samu za su taimaka musu wajen bunkasa sana’o’insu, karfafa hanyoyin samun abin dogaro da kuma samun ‘yancin kai ta fuskar tattalin arziki.
Taron ya samu halartar manyan baki da suka hada da Kakakin Majalisar Dokokin jihar Gombe, Abubakar Muhammad Luggerewo, Shugaban Ƙaramar Hukumar Akko, Kwamishinan Kananan Hukumomi da Harkokin Sarauta, Barista Sani A. A. Haruna; da sauran shugabannin jam’iyyar APC, masu ruwa da tsaki da magoya bayan jam’iyyar daga Ƙaramar Hukumar Akko.
Kayayyakin da aka raba sun hada da babura, injinan nika, takin zamani da injinan dinki, wadanda aka samar domin tallafa wa mata da matasa su dogara da kansu, inganta rayuwarsu da bunkasa sana’o’insu.
