OSIMHEN YA CI GABA DA ZAMA BURIN AL HILAL
Dan wasan gaba na Super Eagles, Victor Osimhen, ya ci gaba da kasancewa babban burin kulob din Al Hilal na Saudi Arabia, kamar yadda mashahurin mai sharhi kan harkar kwallon kafa na Italiya, Gianluigi Longari, ya bayyana.
Longari ya ce Al Hilal na ci gaba da zawarcin Osimhen, duk da cewa kulob din ya fara tattaunawar sayen wasu ‘yan wasa domin karfafa tawagarsa.
Ya bayyana cewa Al Hilal ta cimma yarjejeniyar kashin kanta da dan wasan Chelsea, Pedro Neto, tare da bude tattaunawar cinikayya da Chelsea.
A cewar Longari, dan wasan Manchester City, Savinho, na cikin manyan zabukan da Al Hilal ke duba idan har ba a samu Osimhen ba, yayin da dan wasan Aston Villa, Ollie Watkins, shi ma ya amince da yiwuwar komawa kulob din na Saudi Arabia.
Ya ce Al Hilal na tattaunawa da Aston Villa kan Watkins, amma Osimhen, wanda ke taka leda a Galatasaray, ya kasance **“babban burinsu”**.
A halin yanzu dai, rahotanni sun ce Arsenal ba ta cikin tattaunawar kai tsaye da Galatasaray kan yiwuwar daukar Osimhen a wannan kasuwar saye da sayar da ‘yan wasa.
Saboda haka, komawar dan wasan zuwa Emirates Stadium na ci gaba da kasancewa da matukar wahala kafin rufe kasuwar musayar ‘yan wasa.
