Daga Zainab Babaji a Jos Najeriya
Gwamnan jihar Filato, Caleb Mutfwang ya yi wa fursunoni dari da talatin da cikakkiya afuwa a sassan gidajen gyaran hali a jihar yayin da ya mayar da hukuncin kisa na wasu hudu zuwa daurin rai-da-rai.
Gwamnan ya bayyana matakin ahuwar ne a cikin sakon fatan alheri ga ‘yan Najeriya da al’ummar jihar Filato domin murnar cikar kasar shekaru sittin da shida da samun ‘yancin kai.
Sanarwar da Daraktan Yada Labarai da Hulda da Jama’a ga Gwamnan, Gyang Bere ya fitar, ta ce an dauki matakin ne bisa ga ikon da kundin tsarin mulkin Tarayyar Najeriya ya bai wa Gwamna, kamar yadda aka yi wa kwaskwarima, sannan kuma bayan tuntubar kwamitin ba da shawara kan ahuwa ta Jiha.
Gwamnan, Caleb Mutfwang a cikin sakon, ya bayyana bikin samun ‘yancin kan a matsayin wata dama ga ‘yan Nijeriya su yi tunani a kan tafiyar kasar tun bayan samun ‘yancin kai, da girmama sadaukarwar da shugabannin da suka kafa ta suka yi, da amincewa da kalubalen da ake fama da su da kuma nuna farin cikinsu da irin nasarorin da kasar ta samu.
Ya kuma bukaci ‘yan Najeriya da su sabunta kudurinsu na gina kasa mai dunkulewa, zaman lafiya da wadata, yana mai jaddada cewa gina kasa wani nauyi ne da ya rataya a wuyan jama’a daga wannan zamani zuwa wancan.
A cewar Gwamnan, dole ne a kiyaye hadin kai, diyaucin kasa da kuma iyakokin Najeriya, yayin da ‘yan kasa su tashi tsaye su kawar da bambance-bambancen da ke tsakaninsu, su yi kokarin ganin kasar da kowa ke da ra’ayin zama nasa da kuma damar cimma burinsa.
Mutfwang ya kuma amince da kokarin da shugaba Bola Tinubu ke yi na ganin an dore da hadin kan kasa da zaman lafiya, musamman yadda ya mayar da hankali kan hadin kan kasa, zaman lafiya, da ci gaban tattalin arziki.
Gwamnan ya jaddada kudirin gwamnatinsa na gina jihar Filato inda ‘yan kasa za su iya biyan bukatunsu cikin yanayi na zaman lafiya, tsaro, adalci, da kuma ci gaban kasa baki daya.
Ya yabawa al’ummar jihar Filato bisa juriya da hakuri da kishin kasa, inda ya bukace su da su ci gaba da jajircewa wajen ci gaban jihar da kasa duk da kalubalen da ake fuskanta.
Mutfwang ya taya ’yan Najeriya na gida da na kasashen waje murnar zagayowar ranar, ya kuma yi kira ga ‘yan kasar da su ci gaba da bayar da gudunmawar ci gaban kasa da ta dace da sadaukarwar da jaruman ta suka yi a baya da kuma buri na tsararraki da har yanzu ba a haife su ba.
Ya yi wa ‘yan Nijeriya fatan samun ’yancin kai cikin lumana da ma’ana.
