Fiye da al’ummomi 8,000 da makarantu 4,500 a jihohi 15 na fuskantar barazanar ambaliyar ruwa tsakanin ranar 19 zuwa 25 ga Satumba, a cewar sabon gargadin ambaliyar ruwa da Hukumar Kula da yanayi ta Najeriya (NIHSA) ta fitar.
Hukumar ta yi gargadin cewa hauhawar ruwan koguna na iya haddasa ambaliyar ruwa a wasu al’ummomi masu rauni, lamarin da ka iya jefa makarantu, cibiyoyin kiwon lafiya, kasuwanni, wuraren ibada da gonaki cikin hadarin ambaliya.
Gargadin na cikin sabon rahoton National Flood Advisory da Darakta-Janar kuma Babban Jami’in Gudanarwa na hukumar, Arch. Umar Mohammed, ya fitar a ranar Asabar.
Jihohin da abin ya shafa sun hada da Imo, Cross River, Delta, Ebonyi, Benue, Anambra, Akwa Ibom, Edo, Enugu, Bayelsa, Kogi, Abia, Taraba, Rivers da Legas.
Mohammed ya ce ana sa ran hauhawar ruwan koguna za ta haddasa ambaliya a wasu al’ummomi, tare da jefa makarantu, cibiyoyin kiwon lafiya, kasuwanni, gonaki da wuraren ibada cikin hadari.
Ya bukaci gwamnatocin jihohin da abin ya shafa da su gaggauta kwashe mazauna yankunan da ke cikin hadarin zuwa wuraren da suka fi aminci kafin lokacin da aka yi hasashen ambaliyar.
