Gwamnan jihar Yobe a Najeriya Mai Mala Buni, ya buƙaci manyan limaman masallatan Juma’a da ke Damaturu, babban birnin jihar, da su ƙara himma wajen yin addu’o’in samun zaman lafiya, haɗin kai da kwanciyar hankali a Jihar Yobe da Najeriya baki ɗaya.
Gwamna Buni ya yi wannan kira ne a lokacin da ya gana da limaman, inda ya buƙace su da su riƙa isar da saƙonnin soyayya, zaman lafiya, haƙuri da fahimtar juna a cikin huɗubobin sallolin Juma’a.
Gwamnan ya tunatar da limaman irin munanan abubuwan da jihar ta fuskanta a baya, yana mai jaddada cewa Jihar Yobe ba za ta iya ɗaukar wani sabon rikici ba.
Ya kuma bayyana muhimmancin ƙara yawaita addu’o’i da wayar da kan al’umma kan buƙatar zaman lafiya, musamman yayin da ƙasar ke tunkarar babban zaɓe mai zuwa.
Gwamna Buni ya buƙaci limaman da su yi amfani da matsayinsu wajen ƙarfafa wa al’umma gwiwar rungumar zaman lafiya da kauce wa duk wani abu da ka iya kawo cikas ga tsaro da haɗin kan jihar.
Tun da farko, Mai Bai wa Gwamnan Shawara kan Harkokin Addini, wanda kuma shi ne mai shirya taron, Ustaz Babagana Malam Kyari, ya yaba wa Gwamna Buni bisa matakan da yake ɗauka tun da wuri domin tabbatar da zaman lafiya a lokacin yaƙin neman zaɓe a jihar.
Ustaz Babagana ya bayyana kwarin gwiwarsa cewa wannan kira na gwamnan zai ƙara zaburar da limaman wajen yawaita addu’o’i da tallafa wa ƙoƙarin tabbatar da zaɓe cikin lumana da zaman lafiya tsakanin al’umma.
Taron na daga cikin ƙoƙarin gwamnatin jihar na haɗa kai da shugabannin addini domin inganta zaman lafiya, tsaro da kwanciyar hankali a faɗin jihar Yobe.
