An gudanar da wannan shirin ne ta hannun Hukumar Tara Haraji ta jihar Gombe, ƙarƙashin jagorancin shugabarta, Aisha Adamu, tare da haɗin gwiwar ƙungiyar Imkhahad Development Initiative.
Shirin na tsawon kwanaki uku, wanda aka yi daga ranar ɗaya zuwa uku ga watan Mayu, dubu biyu da ashirin da shida, ya gudana a ƙauyen Hina da ke Ƙaramar Hukumar Yamaltu Deba, inda akayi gwaje-gwaje, shawarwari, magunguna, tiyata da kuma tabarau na gani kyauta ga al’umma.
Da take jawabi a wajen buɗe shirin, Shugabar Hukumar, Aisha Adamu, ta jaddada muhimmancin danganta biyan haraji da ci gaban al’umma kai tsaye. Ta kuma yaba wa Gwamnan jihar Gombe, Muhammadu Inuwa Yahaya, bisa goyon bayan da yake bayarwa, wanda ta ce shi ne ya ba da damar aiwatar da irin waɗannan shirye-shirye.
Ta kuma gode wa ƙungiyar Imkhahad Development Initiative, musamman shugabarta, Umulkairi Adamu, bisa jajircewarta wajen ayyukan jin ƙai da haɗin gwiwa domin magance matsalolin lafiyar idanu a yankunan da ba su da isasshen kulawa.
Shugabannin al’umma ma sun yaba da wannan shiri. Sarkin Yamaltu, Abubakar Aliyu, wanda Alhaji Isa Idris Tela, Hakimin Hina ya wakilta, ya bayyana shirin a matsayin mai muhimmanci kuma mai kawo sauyi, yana mai cewa ingantacciyar lafiyar idanu za ta ƙara yawan aiki da inganta rayuwar al’umma.
A nasa bangaren, Likitan da ya jagoranci shirin daga asibitin Shifa Eye Care, Dokta Lawali Mohammed Kumo, ya shawarci waɗanda suka amfana da su bi umarnin likitoci da kula da kansu bayan tiyata domin samun cikakken waraka.
Abin lura a yayin shirin shi ne, wasu daga cikin waɗanda suka zo ba sa gani sun koma gidajensu suna gani bayan an yi musu tiyata.
Masu amfana da shirin sun bayyana godiyarsu, suna mai cewa wannan taimako ya dawo musu da gani tare da ba su damar ci gaba da gudanar da ayyukansu na yau da kullum.
Shugabar Hukumar Tara Haraji ta Jihar Gombe ta ce shirin na ci gaba da zama hujja cewa yadda ake tara haraji yadda ya kamata na iya haifar da ayyukan ci gaba masu amfani, tare da ƙarfafa amincewar jama’a da kuma ƙara yawan biyan haraji da son rai.
