Iran ko Farisa ranar talata ta bakin mukaddashin ministan harkokin wajen kasar Majid Takht-Ravanci yace a shirye take ta dauki dukkan matakai domin ta cimma yarjejeniya da Amurka kan shirin Nukiliyarta, a dai dai lokacin da kasashen biyu suke shirye shiryen komawa teburin shawarwari.
Ana sa ran gudanar da shawarwarin ranar Alhamis a Geneva, kamar yadda wani babban jami’in Amurka ya fada ranar litinin, inda jakadun Amurka Steve Whitkoff da Jared Kushner, za su gana da tawagar wakilan Iran.
A farkon watan nan ne kasashen biyu suka koma kan teburin shawarwari, yayinda Amurka take jibge kayan yaki a yankin gabas ta tsakiya. Iran tayi barazanar zata kai hari kan sansanonin Amurka muddin aka kai mata hari.
Ahalinda ake ciki kuma, Ranar talata, wani jirgin yaki mai saukar ungulu na Iran, yayi hadari a kasuwan kayan gwari a yankin Isfahan na kasar, ya halaka matuka jirgin su biyu, da ‘yan kasuwa biyu.
