Wata kotu a Uganda ranar Litinin, tayi watsi da karar da hukumomin kasar suka shigar kan mutum na farko da ake tuhuma da laifin “luwadi mafi tsanani,” laifi da idan kotu ta tabbatar ana yanke masa hukuncin kisa, kamar yadda lauyan mutumin ya gayawa kamfanin dillancin labarai na Reuters.
Dokar wacce Uganda ta kafa a shekarar 2023, inda tayi kunnen kashi daga matsin lambar kasashen yammacin duniya, da kungiyoyin kare hakkin Bil’adama na gida da ketare, ana kallon dokar a zaman mafi tsanani a duniya kan ‘yan luwadi, dokar ta yi tanadin daurin rai da rai idan aka kama mutum da laifin luwadi, sannnan ta tanadi hukuncin kisa bisa wasu dalilai na musamman. Sharuddan sun hada da maimaita laifin da ake zargin mutum dashi, ko yin luwadi ga mutumin da bai balaga ba, ko ga tsoho, ko mutumin da yake dauke da wata larura.
Wanda ake tuhuman a yanzu dan shekaru 20 da haifuwa, an kama shi ne a shekara ta 2023, kan zargin yayi luwadi da wani mutum dan shekara 41 da haifuwa, wadda ya fada karkashin rukunin laifi na musamman, kamar yadda lauyansa ya fadawa kamfanin dillancin labarai na Reuters ranar talata.
Ranar Litinin, Alkali a kotun majistrate a Uganda, ya kori karar, bayanda kotu ta fahimci cewa mutumin ya sami gushewar hankali, saboda tsawon lokaci da yayi yana tsare.
Kakakin kotunan Uganda bashi da ta cewa da aka tuntube shi kan wannan shari’ar.
