Ma’aikatar Tsaron Amurka, wato Pentagon, ta bayyana a ranar Laraba cewa ta cimma yarjejeniyoyin tsari da kamfanonin BAE Systems, Lockheed Martin da kuma Honeywell domin ƙara yawan samar da makamai da harsasai, a wani yunkuri na mayar da rundunar sojin Amurka cikin yanayin “shirin yaki.”
Sanarwar na zuwa ne sama da makonni uku bayan Shugaban Amurka Donald Trump tare da Isra’ila sun kaddamar da yaki da Iran.
Haka kuma, ya biyo bayan ganawar da Trump ya yi a farkon wannan watan da shugabannin kamfanonin tsaro guda bakwai, yayin da Pentagon ke kokarin cike gibin makaman da suka ragu sakamakon hare-haren Amurka a Iran da sauran ayyukan soji na baya-bayan nan.
Pentagon din na kuma shirin tura dubban sojojin sama zuwa yankin Tekun Fasha domin bai wa Trump karin zabin bada umarnin kai harin kasa, kamar yadda kamfanin dillancin labarai na Reuters ya ruwaito a ranar Talata.
A karkashin yarjejeniyoyin, bangaren sararin samaniya na kamfanin Honeywell zai ƙara hanzarta samar da muhimman kayayyakin haɗa makamai na ajiyar Amurka, a wani bangare na zuba jarin dala miliyan 500 na tsawon shekaru da dama, kamar yadda Pentagon ta bayyana.
