Shugaban Amurka Donald Trump ya sanar da nada Kevin Warsh a matsayin shugaban bankin tarayya na kasa don maye gurbin Jerome Powell, wanda wa’adin sa zai kare ranar 15 ga watan Mayu. Tun Jiya rade-radin nada Warsh din ya dagulawa kasuwannin hannun jari lissafi, inda farashin gwal ya fadi da fiye da kashi hudu cikin 100 saboda ganin da ake masa na me tsatssauran ra’ayi ne, amma duk da haka gwal din na daf da samun riba mafi tsoka cikin wata daya da bai taba samu ba tun shekarar 1980, bayan da masu sa hannun jari suka koma sayen sa a matsayin mafaka lokacin da ake tsaka da rigingimun siysar kasa da kasa, da kuma rikicin tattalin arziki.
Gwal da ake kira spot gold ya yi asarar kashi 3.9 cikin dari, yayin da kuma hada-hadar gwala-gwalan a kasuwar Amurka yayi asarar kashi 2.7 cikin dari.
Bayan gwal ma, farashin kayyaki a kasuwannin hannun jari sun yi kasa, duk saboda rade-radin cewa Kevin Warsh zai maye gurbin Jerome Powell.
Hannayen jari masu sauki na S&P 500 sun fadi da kashi 0.4 cikin dari, yayin da na Nasdaq suka fadi da kashi 0.5 cikin dari, farashin sauran duwatsu masu daraja suma suka fadi, bayan da kamfanin dillacin labarai na Reuters ya ruwaito cewa Kevin Warsh ya ziyarci fadar White House don ganawa da Donald Trump ranar Alhamis.
