Fafaroma Pope Leo ya bayyana a ranar Lahadi cewa Allah ba ya karɓar addu’o’in shugabannin da ke fara yaƙe-yaƙe kuma “hannuwansu cike suke da jini,” a wata magana mai ƙarfi da ya yi yayin da yaƙin Iran ya shiga wata na biyu.
A dai-dai lokacin da yake jawabi ga dubban mutane a dandalin St. Peter’s Square a ranar Palm Sunday bikin da ke buɗe mako mai tsarki kafin Easter ga Mabiya darikar Katolika biliyan 1.4 miliyan a duniya Fafaroman ya bayyana rikicin a matsayin “mummuna ƙwarai,” yana mai cewa ba za a iya amfani da Yesu don halatta wani yaƙi ba.
Ya ce: “Wannan shi ne Allahnmu: Yesu, Sarkin Salama, wanda ke ƙin yaƙi, kuma babu wanda zai iya amfani da shi don halatta yaƙi.” Leo, wanda shi ne Fafaroma na farko daga Amurka, ya faɗa wa taron jama’a a cikin hasken rana mai ƙyalli.
Ya ƙara da cewa: “(Yesu) ba ya sauraron addu’o’in waɗanda ke tayar da yaƙi, sai dai yana ƙin su, yana cewa: ‘Ko da kuna yawaita addu’a, ba zan saurara ba: hannuwanku cike suke da jini,’” yana mai ambaton wani sashe na Littafi Mai Tsarki.
Fafaroman bai ambaci sunan wani shugaba na duniya kai tsaye ba, amma ya ƙara tsananta suka kan yaƙin Iran a makonnin baya-bayan nan.
