Manyan jami’an shige da fice na kasar Amurka karkashin mulkin Donald Trump sun sha yin bayanai da daga baya hujjoji ke nuna sabanin haka bayan aukuwar mummunar artabu tsakanin jami’an tsaro da ‘yan kasa, ciki har da kisan wasu ‘yan kasa biyu a garin Minneapolis, kamar yadda kamfanin dillancin labarai na Reuters ya gano.
Jami’an gwamnati sun yi sauri nuna cewa mutane biyu da aka kashe kwanan nan Renee Good da Alex Pretti, sun far ma jami’an tsaro ne da neman halaka su, saboda haka kisan da aka yi musu ya dace. Amma hujja ta bidiyo ta nuna akasin haka, abinda ke kawo shakku wajen mutanen kan ingancin hujjojin jami’an gwamnati.
Abinda kamfanin dillacin labarai na Reuters ya dubo ya hada da wadannan mutane biyu da aka kashe, da kuma wasu hudu a watannin baya bayannan, inda jami’ai suka yi saurin kare jami’an shige da fice ba tare da sun jira an yi kwakkwaran bincike ba, abinda tsofaffin jami’an shige da fice ke ganin ya sabawa yadda aka saba yi a irin wannan yanayi.
