Wasu ƴan Daba sun kai farmaki kasuwar siyar da wayoyi ta farm center dake Kano da tsakar rana.
Wata majiya a kasuwar ta shaidawa Manema labarai cewa, ƴan daban, wadanda ake zargin sun halarci taron siyasa na dan takarar Sanata a Kano ta Tsakiya, A.A Zaura, sun farmaki wajen siyar da wayar na Yoyo Plaza dake kasuwar.
Majiyar ta kara da cewa, ƴan daban sun daka wawa tare da sara ga ƴan kasuwar dake tsaka da ciniki.
Haka kuma, sun dinga kwacewa mutane wayoyinsu a kan hanya.
Sai dai, rahotanni na nuni da cewa tuni jami’an tsaro na ƴan sanda suka yiwa wajen kawanya bayan korar ƴan daban.
Har zuwa lokacin hada wannan rahotan dai ba a samu labarin jikkata ko rasa rai ba game da harin.
