Ma’aikatar Lafiya ta jihar Gombe tare da haɗin gwiwar Asusun Tallafin Duniya na Global Fund da Hukumar Yaƙi da Cutar Kanjamau ta Ƙasa, NACA, sun ƙaddamar da maganin rigakafin kamuwa da cutar HIV mai suna LENACAPAVIR ko kuma LEN PrEP, wanda ake yi wa mutum allura sau biyu kacal a shekara.
An tsara wannan magani ne domin mutanen da ba su ɗauke da cutar HIV ba, musamman masu shiga haɗarin kamuwa da cutar, domin hana yaduwar sabbin kamuwa da cutar.
Da yake jawabi yayin ƙaddamar da maganin, Babban Sakataren Hukumar Raya Kiwon Lafiya ta Matakin Farko ta Jihar Gombe, Dakta Abdurrahman Shu’aibu, ya ce hukumar za ta horas da ma’aikatan lafiya tare da ƙara sa ido da wayar da kan jama’a a matakin ƙasa domin kawar da jita-jita da rashin fahimta dangane da sabon maganin allurar.
Dakta Shu’aibu ya bayyana cewa jihar Gombe ita ce jiha ta takwas da aka zaɓa domin fara amfani da maganin rigakafin HIV ta allura, yana mai danganta hakan da irin ƙoƙarin gwamnatin jihar wajen bunƙasa harkokin lafiya.
Shi ma Daraktan Kula da Cututtuka na Hukumar Raya Kiwon Lafiya ta Matakin Farko ta jihar, Dakta Mustafa Musa, ya ce maganin yana da inganci kuma an tanade shi ne domin mutanen da ke cikin haɗarin kamuwa da cutar HIV, domin rage yaɗuwar cutar.
A nasa jawabin, Manajan Shirin Kula da Cutar Hepatitis da Cututtukan Saduwa ta Jihar, SASCP Mohammed Sanusi, ya bayyana maganin a matsayin wani muhimmin ƙari a dabarun rigakafin HIV a jihar.
Ya ce an riga an samar da maganin a cibiyoyin lafiya da aka ware, ciki har da Asibitin Kwararru na jihar Gombe da Babban Asibitin Kaltungo, tare da kira ga waɗanda suka cancanta da su yi amfani da damar.
Taron ƙaddamarwar ya haɗa da yi wa wasu da suka amfana allurar rigakafin HIV da kuma sauran ayyuka masu alaƙa da wayar da kai
