Ceferin Ya Ce Ba Zai Yi Takarar Shugabancin FIFA Ba, Yayin da Infantino Ke Neman Goyon Bayan Kasashe Masu Karamin Karfi
Shugaban hukumar kwallon kafa ta Turai UEFA, Aleksander Čeferin, ya ce ba zai tsaya takarar shugabancin FIFA ba a zaben da ake sa ran gudanarwa a watan Maris na 2027.
Čeferin ya bayyana cewa, duk da cewa yana adawa da wasu matakai da shugaban FIFA, Gianni Infantino, ke dauka, ba shi da niyyar neman maye gurbinsa. Sai dai ya yi hasashen cewa wani dan takara zai fito domin kalubalantar Infantino a zaben.
Čeferin ya kasance daya daga cikin manyan masu sukar Infantino, musamman kan shirin da FIFA ta gabatar na sayar da wani kaso na kudaden kasuwancin gasannin FIFA ga masu zuba jari masu zaman kansu. An yi watsi da shirin ne bayan fuskantar turjiya daga hukumomin kwallon kafa daban-daban.
Shugaban UEFA ya bayyana shirin a matsayin wani abu da ya fi hatsarin da shirin European Super League ya haifar, yana mai cewa matakin zai iya yin illa ga tsarin tafiyar da kwallon kafa na duniya.
A daya bangaren kuma, Infantino na ci gaba da yakin neman goyon baya domin sake lashe zaben shugabancin FIFA, inda yake gabatar da kansa a matsayin wanda ke kare muradun kasashe masu karamin karfin tattalin arziki a fagen kwallon kafa.
Infantino ya ce FIFA na da nauyin rage tazarar tattalin arziki tsakanin kasashe mambobin kungiyar 211, tare da tabbatar da cewa kasashe masu tasowa su ma suna samun damar bunkasa kwallon kafa da cin gajiyar kudaden FIFA.
Sai dai matsin lamba na ci gaba da karuwa kan Infantino. UEFA, CONCACAF da wasu bangarorin hukumar kwallon kafa ta Asiya na tattauna yiwuwar daukar matakin rashin amincewa da shugabancinsa, yayin da wasu kasashe suka janye goyon bayansu gare shi.
A nahiyar Afirka kuwa, har yanzu kungiyar CAF na daga cikin manyan kungiyoyin da ke nuna goyon baya ga Infantino. Shugaban Hukumar Kwallon Kafa ta Kamaru, Samuel Eto’o, ma ya fito fili ya kare Infantino, yana mai cewa wasu daga cikin sukar da ake yi masa na da alaka da siyasar zaben shugabancin FIFA.
Rahotanni sun kuma ce ana ta tattaunawa kan yiwuwar samun wani dan takara da zai kalubalanci Infantino, yayin da wa’adin gabatar da sunayen ‘yan takara ke gabatowa.
Zaben shugaban FIFA na gaba zai kasance daya daga cikin zabukan da suka fi daukar hankali a tarihin kwallon kafa ta duniya, musamman saboda rarrabuwar kawuna tsakanin Turai da wasu daga cikin sauran nahiyoyi kan yadda ake tafiyar da FIFA da makomar kwallon kafa ta duniya.
