Gwamnan jihar Bauchi a Arewa Maso Gabashin Najeriya Sanata Bala Abdulkadir Mohammed, ya gana da Shugaban Kamfanin Hummels Water Engineering na ƙasar Hungary, Injiniya Peter Hummel, a Abuja, domin nemo mafita kan matsalar matatar ruwan Alkaleri.
Ganawar ta biyo bayan bukatar Gwamna Bala Mohammed ga injiniyoyin Hungary da suka girka matatar, da su dawo Jihar Bauchi domin gudanar da gyare-gyare da aikin fasaha da zai ba da damar dawo da matatar cikin cikakken aiki.
Matatar ruwan, wadda gwamnatin Hungary ta gina tare da bai wa Najeriya a matsayin tallafin jin kai a shekarar 2023, tana da ƙarfin samar da kusan lita dubu 40 na tsaftataccen ruwa a kullum, wanda ke amfanar da kimanin mutane dubu 4.
Gwamnan ya bayyana cewa matatar ta daina aiki ne sakamakon matsalolin kula da ita da kuma gudanar da aikinta, inda ya ce gwamnatin jihar ta ɗauki matakin dawo da injiniyoyin da suka girka ta domin su taimaka wajen gano matsalar tare da magance ta.
Sanata Bala Mohammed ya gode wa gwamnatin Hungary da Kamfanin Hummels Water Engineering bisa haɗin gwiwa, yana mai jaddada aniyar gwamnatinsa na samar da ingantattun hanyoyin samun tsaftataccen ruwan sha ga al’ummar Jihar Bauchi.
Ya ce matakin na daga cikin ƙoƙarin gwamnati na rage matsalar ƙarancin ruwan sha da inganta rayuwar al’ummomin da ke fama da ƙalubalen samun tsaftataccen ruwa.
