An gudanar da wani taron wayar da kan matasa daga kasashe 6 na yankin sahel a Jamhuriyar Nijar. Taron na wuni biyu da zummar tattauna hanyoyin kare matasa daga masu aikata aiyukan asha. A karshen wannan zama mahalartan za su fitar da wani kundin da za a gabatar wa hukumomi domin daukan matakai.
La’akari da irin barazanar da matasa ke fuskanta daga masu tafka ta’asa a fannoni irin su tsaro ko siyasa, Tattalin arziki da sauransu ya sa kungiyar kasa da kasa ta Gorée Institute shirya wannan taro na wuni 2 domin matasan yankin sahel, a wani yunkurin bai wa wannan rukuni dama wajen tafiyar da lamura a gwamnatance.
Ministan matasa da wasannin motsa jiki na Nijar Mohamed Sidi shi ne ya jagoranci bikin bude wannan zama. Ya kuma bayyana fata game da yadda ya kamata matasa su kasance a nan gaba.
A yayin mahwarorin da za su yi a wannan haduwa mahalartan zasu tsaida shawarwari na bai daya, wadanda su ke kallo a matsayin mafitar matsalolin da ke jefa matasa bin hanyoyin da ba su dace ba, kamar yadda Awal Oumarou Ibrahim ya bayyana.
Taron Wanda shine karo na 6 da ake shirya makamancinsa na samun halartar jagororin matasa daga kasashen Senegal, Mali, Cote D’ivoire, Burkina Faso, Jamhuriyar Benin da Nijar mai masaukin baki.
