Da alamun Cristioano Ronaldo zai buga ma Portugal dukkan wasanninta a gasar cin kofin kwallon kafar duniya ta shekara mai zuwa, duk da jan katin da aka ba shi lokacin da ya buge wani dan wasan Ireland da gwiwar hannu.
A yau Talata hukumar kwallon kafa ta duniya FIFA ta wallafa hukumcin dakatar da shi daga wasanni uku da ta yanke, amma ta ce wasa daya dole zai rasa, sauran biyu kuma an dage hukumci a kansu har na tsawon shekara guda domin a ga ko zai sake aikata irin abinda yayi har aka ba shi jan katin.
An dakatar da Ronaldo daga buga wasa guda na tilas a lokacin da kasarsa ta buga da Armeniya ta lashe da ci 9-1, abinda ya tabbatar da gurbinta a gasar cin kofin duniyar da za a yi a nan yankin nahiyar Amurka ta arewa a shekara mai zuwa.
Masu fashin baki da dama sun dauka cewa za a dakatar da Ronaldo daga karin wasa guda, ta yadda za a fara buga gasar cin kofin duniyar ba tare da shi ba.
Wannan shine karo na 6 da Ronaldo zai buga ma Portugal kwallo a gasar cin kofin duniya, abinda babu wani dan wasan da ya taba haka.
