Farashin mai a kasuwanni duniya ya tashi ranar jumma’a, saboda shakkun da ake dashi na yi yuwar a tsagaita wuta a yakin nan da yanzu aka yi wata guda ana gwabzawa, duk da haka wannan ne makon farko da mai mafi daraja da ake kira Brent farashinsa zai sassauto, bayanda shugaban Amurka Donald Trump yace shawarwari da Iran suna tafiya yadda ya kamata, ba tare da ya bada wani karin bayani ba.
Farashin mai na Brent ya haura da dala 3 da centi 51, ya tsaya kan dala 111 da centi 52 kan ko wace ganga, yayinda mai da ake kira West Texas ya tashi da dala 4 da centi shida, ya tsaya kan dala 98 da centi 54 akan ko wace gangar danyen mai.
Farashin man mai da daraja da ake kira Brent ya karu da kashi 53 cikin dari tun ranar 27 ga watan Febwairu, kwana daya kamin Amurka da Isra’ila su kaddamar da yakin kan Iran, amma ya ragu da kasa da kashi daya makon nan, shi mai da ake kira West Texas, ya karu da kashi 45 cikin dari tun fara yakin, kuma kullum sai karuwa yake yi sannu a hankali.
‘Yan kasuwa suna taka tsantsan kan kalaman shugaba Trump game da shawarwari da Iran.
Wani jami’in Iran ya gayawa kamfanin dillancin labarai na Reuters cewa, sharuddan da Amurka ta gabatar mata ta hanun Pakistan babu adalci a ciki.
