Hukumar GoHealth ta ƙaddamar da tsarin kula da masu cin gajiyar inshorar lafiya ta hanyar fasaha tare da yin kira da a ƙara haɗin gwiwa tsakanin sassan asibitoci.
Hukumar Kula da Shirin Inshorar Lafiya na Masu Bayar da Gudunmawa ta jihar Gombe a Najeriya GoHealth, ta kammala horo na musamman na tsawon kwanaki biyu ga ma’aikatan lafiya daga ƙananan hukumomin Akko, Balanga da Gombe, domin sauya harkokin gudanar da ayyukan hukumar zuwa tsarin dijital gaba ɗaya.
Horarwar na daga cikin shirin hukumar na samar da tsarin kula da marasa lafiya ba tare da amfani da takardun fayiloli ba, ta hanyar amfani da sabuwar manhajar yanar gizo da ta wayar hannu wajen gudanar da bayanan masu cin gajiyar shirin.
Ana sa ran sabon tsarin zai taimaka wajen inganta kula da marasa lafiya, ƙara saurin gudanar da ayyuka, da kuma rage lokacin da ake ɗauka wajen samar da hidimomin lafiya.
Da yake buɗe horon, Babban Sakataren GoHealth, Dr. Abubakar Musa, wanda Daraktan Tsare-tsare, Bincike da Ƙididdiga, Mista Tanimu Umar, ya wakilta, ya bayyana sauya tsarin zuwa dijital a matsayin wani muhimmin mataki wajen zamanantar da harkokin kula da lafiya a jihar Gombe.
Ya ce burin hukumar shi ne samar da tsarin da mai cin gajiyar inshorar zai shiga asibiti, a tabbatar da shaidarsa, sannan a samu bayanan lafiyarsa cikin gaggawa da tsaro, ba tare da ya riƙa ɗaukar fayil ɗin takarda daga wani sashe zuwa wani ba.
Malam Tanimu Umar ya ce sabon tsarin zai taimaka wajen magance matsalolin ɓacewar fayilolin marasa lafiya, rarrabuwar bayanan tarihi na lafiyar mara lafiya da kuma jinkirin biyan kuɗaɗen hidimar lafiya.
Ya ƙara da cewa tsarin zai ƙarfafa haɗin gwiwa tsakanin sassan asibitoci, tare da sa cibiyoyin lafiya su ƙara amfani da fasahar sadarwa wajen gudanar da ayyukansu.
Shi kuwa Daraktan Fasahar Sadarwa da Bayanai na GoHealth, Malam Gidado Musa Biri, ya ce an shirya horon ne domin bai wa ma’aikatan lafiya ƙwarewar da za ta ba su damar amfani da sabon tsarin cikin sauƙi a dukkan matakan samar da hidimar lafiya.
Ya ce mahalarta sun samu horo kan rajistar masu cin gajiyar shirin, tsara lokacin ganin likita, karɓar marasa lafiya, rubuta bayanan jinya, gudanar da gwaje-gwaje, rubuta magunguna, tura marasa lafiya zuwa wasu sassa da kuma gabatar da bayanan neman biyan kuɗin hidima.
An kuma horas da su kan yadda ake amfani da tsarin kantin magani, dakin gwaje-gwaje, sashen rediyo da tiyata, da kuma yadda ake gudanar da kwantar da marasa lafiya, bibiyar gadaje, amfani da jadawalin magunguna na lantarki da kuma sallamar marasa lafiya.
Manajan Ayyuka na GoHealth, Dr. Gideon Maspara, ne ya jagoranci zaman koyarwar aikace-aikacen, inda ya bai wa mahalarta damar gudanar da gwaje-gwaje kai tsaye kan yadda sabon tsarin yake aiki.
A yayin rufe horon, Daraktar Ayyuka da Tabbatar da Ingancin Hidima, Hajiya Wasilatu Umar Sambo, ta buƙaci mahalarta da su ci gaba da atisaye kan tsarin tare da koyar da abokan aikinsu abin da suka koya.
Ta ce nasarar sauya GoHealth zuwa tsarin dijital ba za ta tabbata ba sai kowane ma’aikacin lafiya ya rungumi sabon tsarin tare da taimaka wa sauran ma’aikata wajen fahimtarsa.
GoHealth ta ce za a gudanar da irin wannan horo a sauran ƙananan hukumomi takwas na Jihar Gombe cikin makonni biyu masu zuwa, kafin fara amfani da sabon tsarin dijital ɗin gaba ɗaya.
