A Jamhuriyar Nijar ‘yayan hambararren shugaban kasa Mohamed Bazoum sun bayyana damuwa dangane da yadda ake ci gaba da tsare mahaifansu sama da shekaru 2 bayan kifar da shi daga karaga.
A cewarsu dukkan abubuwan da a ke zargin bayansu da shi ba su da tushe saboda haka su ke kiran kasashen duniya su dubi wannan batu.
A yayin da shugaba Mohamed Bazoum da mai dakinsa Hadiza Bazoum ke cika watanni 28 a tsare ne ‘yayansu suka fitar da sanarwar hadin guiwa domin tada duniya daga barci dangane da halin da mahaifansu ke ciki Wanda kuma su kansu ke shafar ra’ayinsu inji su. Hinda Mohamed Bazoum na daga cikin ‘yayan hambararren shugaban kasar ta Nijar.
Mohamed Bazoum wanda ke tsare a fadar shugaban kasa na fuskantar zarge zargen da hukumomi suka ayyana a matsayin cin amanar kasa. sai dai ‘yayansa na ganin Babu wasu hujjojin da ke gaskata laifikan da ake zarginsa da su.
Kawo yanzu ba wata sanarwar gwamnati a game da wannan batun.
A Watan yunin 2024 kotun shara’ar manyan Jami’an gwamnatin Nijar ta cire wa Mohamed Bazoum rigar kariya amma har zuwa wannan lokaci ba a taba gurfanar da shi gabn alkali ba domin yi masa shari’a.
A baya kotun ECOWAS da kungiyoyin kasa da kasa har ma da hukumar Majalisar Dinkin Duniya mai kula da kare hakkin dan adam sun bukaci gwamnatin mulkin sojan Nijar ta sallame shi sai dai wadanan kiraye kiraye ba su samu karbuwa ba.
