Mutane 38 Sun Mutu, 218 Sun Jikkata a Wata Ɗaya Sakamakon Hatsarurrukan Mota.
Hukumar Kiyaye Haddura ta Ƙasa, FRSC, reshen jihar Gombe, ta ce ta samu rahoton hatsarurrukan mota 38 tsakanin ranar 15 ga Disamba, 2025, zuwa 15 ga Janairu, 2026.
A cewar hukumar, hatsarurrukan sun shafi motoci 74 tare da shafar mutane 345, Daga cikin adadin, mutane 218 sun samu raunuka daban-daban, yayin da mutane 38 suka rasa rayukansu.
Wannan na ƙunshe ne cikin wata sanarwa da kakakin hukumar, Route Commander Janet Kassa, ta fitar a madadin Kwamandan Sashen jihar, Samson Kaura, kuma aka bai wa manema labarai a Gombe.
Sanarwar ta danganta mafi yawan hatsarurrukan da kuskuren ɗan Adam da kuma matsalolin injunan mota, ciki har da ɗaukar kaya ko fasinjoji fiye da ƙima, gudu ba bisa ƙa’ida ba, gajiyar direba, da tuƙi a ƙarƙashin tasirin ƙwayoyi.
Sauran abubuwan da suka taimaka wajen faruwar hatsarurrukan sun haɗa da lalacewar tayoyi, matsalar birki, da rashin isasshen haske, kayan tsaro, ko kuma alamomin hanya.
Hukumar ta yi kira ga direbobi da su guji tuƙin ganganci, amfani da wayar hannu yayin tuƙi, tafiya saɓanin hanya, da duk wani abu da ke iya daukar hankalinsu daga kan hanya.
Da take jaddada cewa kiyaye lafiya nauyi ne na kowa da kowa, Janet Kassa ta ce dole ne direbobi su daina tuƙi cikin sakaci.
Hukumar ta kuma tabbatar da ƙudirin ta na rage yawan hatsarurrukan mota zuwa mafi ƙarancin mataki.
A cewar sanarwar, “FRSC na ci gaba da aiwatar da ayyukanta na tabbatar da hanyoyi masu aminci a jihar Gombe ta hanyar sintiri na yau da kullum, cire cikas a kan hanya, ayyukan ceto, da wayar da kan jama’a a tashoshin mota da wuraren ibada.”
Hukumar ta lura cewa ƙarshen shekara da farkon sabuwar shekara na daga cikin lokutan da ake samun yawaitar zirga-zirga sakamakon ƙaruwa a harkokin jama’a, lamarin da galibi ke zuwa da barazana ga rayuka da kuma tattalin arziki.
