Nwakali Na Dab Da Komawa Kungiyar PAC Omonia Ta Cyprus
Dan wasan tsakiya na Super Eagles, Kelechi Nwakali, na dab da ci gaba da taka leda a kasar Cyprus bayan ya rabu da kungiyar Barnsley FC ta gasar EFL a Ingila.
Nwakali na gab da komawa kungiyar PAC Omonia da ke buga gasar First Division ta Cyprus.
Dan wasan mai shekaru 28 ya cimma yarjejeniyar soke kwangilarsa da Barnsley FC bisa amincewar bangarorin biyu, lamarin da ya sanya ya zama dan wasa mara kungiya tare da bude masa kofar komawa Cyprus.
Nwakali, wanda tsohon dan wasan Golden Eaglets ne, ya taba taka leda a kasashen Netherlands, Spain, Portugal da Ingila a tsawon rayuwarsa ta kwallon kafa.
Ana sa ran komawarsa PAC Omonia zai ba dan wasan damar farfado da rayuwarsa ta kwallon kafa tare da sake tabbatar da kansa a gasar manyan kungiyoyin Cyprus.
