Babbar kasuwar hada hadar kayayyakin abinci ta Singa dake Kanon Nigeria ta gamu da ibtila’in gobara a daren ranar Asabar, inda ta rika ci har zuwa wayewar garin ranar Lahadi, kafin a shawo kan ta. Gobarar ta jawo asarar daruruwan miliyoyin Naira.
Wutar ta fara ne daga wani wuri da ake kira Gidan Gilas, inda akwai sito-sito na aje kayayyaki da kuma shagunan kayayyakin masarufi.
Wadanda abun ya faru a kan idon su, sun ce wutar ta fara ne da karfe tara na dare, bayan da kasuwa ta rufe. Har yanzu ba’a san musabbabin da ya janyo gobarar ba.
