Kwamishinan ‘Yan Sandan jihar Gombe, CP Umar Ahmed Chuso, ya ce ci gaba da tattaunawa da kuma daukar matakin gaggawa kan matsalolin da ke tasowa shi ne mafita wajen hana rikice-rikicen makiyaya da manoma a jihar.
CP Chuso ya bayyana haka ne yayin taron tattaunawa da masu ruwa da tsaki kan rikicin makiyaya da manoma da aka gudanar a Hedikwatar Rundunar ‘Yan Sandan jihar Gombe.
Ya ce idan shugabannin al’umma a matakai daban-daban suka rika magance matsalolin tun kafin su rikide zuwa rikici, za a samu raguwar rikice-rikicen makiyaya da manoma.
Kwamishinan ‘yan sandan ya bayyana cewa dalilan rikicin makiyaya da manoma sun bambanta daga wannan yanki zuwa wani, don haka akwai bukatar duk masu ruwa da tsaki su hada kai wajen samar da mafita mai dorewa.
Ya yabawa Gwamnan jihar Gombe, Muhammadu Inuwa Yahaya, bisa kafa kwamitocin sasanta rikice-rikice a matakai daban-daban, yana mai cewa hakan ya taimaka wajen rage nauyin da ke kan rundunar ‘yan sanda da sauran hukumomin tsaro wajen tabbatar da zaman lafiya da tsaro.
Taron ya tattauna kan muhimman batutuwa da suka hada da mamaye hanyoyin shanun kiwo, samar da wuraren kiwo na zamani (ranches), zirga-zirgar dabbobi daga jiha zuwa jiha domin kiwo, da kuma hanyoyin gaggauta kai rahoton duk wata matsala domin daukar matakin da ya dace cikin lokaci.
Taron ya samu halartar sarakunan gargajiya, shugabannin addinai, shugabannin makiyaya na Fulani da suka Gudanar da jawabai amadadin mabiyansu Daga dukkan Sassan jihar Gombe da kuma manyan jami’an rundunar ‘yan sanda daga kananan hukumomi goma sha daya na jihar Gombe, domin karfafa hadin gwiwa wajen tabbatar da zaman lafiya tsakanin manoma da makiyaya.
