Jam’iyyar PDP ta sanya ranar Talata, 29 ga Satumba 2026, domin gudanar da sabon zaɓen fid-da-gwani na takarar gwamnan jihar Gombe, bayan Babbar Kotun Tarayya da ke Gombe ta soke zaɓen da ya gabata wanda ya samar da Farfesa Isa Ali Pantami a matsayin ɗan takarar jam’iyyar na zaɓen 2027.
Jam’iyyar PDP ta ɗauki matakin gudanar da sabon zaɓen fid-da-gwani ne bayan hukuncin Babbar Kotun Tarayya da ke Gombe, wadda ta umarci jam’iyyar da ta sake gudanar da zaɓen bisa kundinta, ƙa’idojinta da dokokin zaɓe.
Mai shari’a Amina Aliyu Mohammed ce ta yanke hukuncin, bayan wani ƙara da ɗaya daga cikin masu neman tikitin gwamnan PDP, Usman Aliyu Garry, ya shigar yana ƙalubalantar tsarin da aka bi wajen fitar da Pantami.
A zaɓen da ya gabata a watan Mayun 2026, Pantami ya samu tikitin PDP ne ta hanyar amincewar murya, bayan ya koma jam’iyyar daga APC. Sai dai kotun ta soke tsarin tare da umartar PDP da ta gudanar da sabon zaɓen fid-da-gwani.
Rahotannin da suka fito ranar Juma’a sun ce PDP ta tantance Farfesa Isa Ali Pantami, Khamisu Ahmed Mailantarki da Usman Aliyu Garry domin shiga sabon zaɓen da aka sanya ranar Talata, 29 ga Satumba.
A baya, PDP ta bayyana cewa za ta mutunta hukuncin kotu tare da ɗaukar matakan da suka dace domin gudanar da sabon zaɓen cikin bin ƙa’idodin jam’iyyar da dokokin ƙasar.
Jam’iyyar ta kuma yi kira ga mambobinta da masu ruwa da tsaki a Gombe da su kasance cikin nutsuwa, bin doka da haɗin kai yayin da ake kammala shirye-shiryen sabon zaɓen.
