An Kaddamar da Kwamitin Gasar Kofin Haɗin Kan Masarautun Gargajiya na Gombe 2026
An kaddamar da Kwamitin Shirya Gasar Ƙwallon Ƙafa ta Haɗin Kan Masarautun Gargajiya na jihar Gombe dake arewa maso gabashin Najeriya, wadda aka fi sani da Kofin Haɗin Kan Sarkin Gombe 2026, a hukumance a birnin Gombe.
An gudanar da bikin kaddamarwar ne a taron farko na kwamitin, inda aka miƙa wa mambobinsa takardun shaidar aikinsu. Bayan haka, an gudanar da taron manema labarai da ya samu halartar wakilan manyan kafafen yaɗa labarai.
Da yake jawabi yayin taron, Shugaban Kwamitin kuma mai ɗaukar nauyin gasar, Ahmed Shuaibu Gara Gombe, ya bayyana cewa an shirya gasar ne domin ƙarfafa haɗin kai, zaman lafiya da kuma bunƙasa matasa ta hanyar wasanni a masarautun gargajiya na jihar.
Ya ƙara da cewa gasar za ta gudana ne da tsarin haɗaka, inda za a raba ƙungiyoyin da za su fafata gida huɗu a cibiyoyi huɗu, bisa shawarwarin da Kwamitin Fasaha zai bayar.
Ahmed Shuaibu Gara Gombe ya kuma sanar da kyaututtuka masu tsoka da aka tanada kuma kungiyar da ta zama zakara za ta samu naira miliyan biyar tare da kofi, ta biyu kuma naira miliyan uku, yayin da ta uku za ta samu naira miliyan biyu.
Haka kuma za a bayar da lambobin yabo na musamman ga Mafi Kyawun Mai Tsaron Raga, Wanda Ya Fi Zura Ƙwallaye, Fitaccen Ɗan Wasa na Gasar, da kuma Ƙungiyar da Ta Fi Nuna Wasan Gaskiya, duk tare da kofuna.
Mai ɗaukar nauyin gasar ya kuma bayyana cewa za a fara rangadin nuna kofin gasar a faɗin jihar daga Litinin, 2 ga Fabrairu, 2026, zuwa Jumma’a, 6 ga Fabrairu, 2026.
Rangadin zai zagaya dukkan masarautun gargajiya 15 na jihar, farawa daga Masarautun Nafada da Funakaye, sannan ya wuce Yamaltu, Deba, Waja, Kaltungo, Tangale, Akko, Pindiga, Cham, Dadiya, Tula, Gona, da Dukku.
Ana shirya gasar Kofin Sarkin Gombe ta 2026 ne tare da ɗaukar nauyinta daga kamfanin Green White Green Sports Center Limited, tare da goyon bayan Mai Martaba Sarkin Gombe.
Ana sa ran gasar za ta ƙara bunƙasa harkokin ƙwallon ƙafa a matakin tushe tare da ƙarfafa haɗin kai tsakanin al’ummomin jihar Gombe.
Kwamitin shirya gasar na ƙarƙashin jagorancin Ahmed Shuaibu Gara Gombe a matsayin Shugaba, yayin da Auwal Musa Umar, tsohon Shugaban Hukumar Ƙwallon Ƙafa ta jihar Gombe, ke matsayin Mataimakin Shugaba.
Sauran mambobin kwamitin sun haɗa da masu riƙe da sarautun gargajiya da wakilan al’umma, yayin da Haruna Abdullahi yake a matsayin Sakatare da Yakubu Maikudi Jami’an yada labarai tare da masu kula da harkokin yaɗa labarai da tallafin tsare-tsare na Musamman.
