A jiya jumma’a ministan harkokin wajen Rasha Sergei Lavrov da takwaran aikinsa na Iran Abbas Araqchi, sun tattauna kan bin hanyoyin difilomasiyya wajen kawo karshen yakin na gabas ta tsakiya, kamar yadda ma’aikatar harkokin wajen Rashan ta fada a cikin wata sanarwa data fitar.
Sanarwar tace, “ministocin sun tattauna kan matakin soja da siyasa mai sarakakiyar gaske a gabas ta tsakiya, wadda ya taso sakamakon harin siddan da Amurka da Isra’ila suka kaddamar kan Iran,” kamar yadda sanarwar da aka wallafa a shafin ma’aikatar harkokin wajen Rashan a internet ta fada.
Manyan jami’an difilomasiyyar biyu sun kuma tattauna kan komawa tafarkin difilomasiyya wajen warware rikicin tare da mutunta dokokin kasa da kasa, da burin kasashe da suke yankin.
Rasha da Iran sun kulla yarjejeniya ta fuskar siyasa, tattalin arziki, da harkar soja, da kuma hadin kai a bangaren makamashi, amma yarjejeniyar bata hada da kare junansu ba.
