Shugaban Kamfanin Kasuwar Hannayen Jari ta Najeriya (NGX Group), Alhaji Dakta Umaru Kwairanga, Sarkin Fulanin Gombe, ya taya shugabanni, ma’aikata da masu ruwa da tsaki na HBM Nigeria Plc murnar sauya sunan kamfanin daga Lafarge Africa Plc zuwa HBM Nigeria Plc.
Kwairanga ya bayyana hakan ne a wajen bikin ƙaddamar da sabon sunan kamfanin da aka gudanar a birnin Lagos ranar Lahadi, 21 ga Yuni, 2026.
Ya bayyana kamfanin a matsayin ɗaya daga cikin tsofaffi kuma fitattun kamfanonin masana’antu a Najeriya, yana mai cewa tarihin kamfanin ya samo asali tun shekarar 1960 lokacin da aka fara samar da siminti a masana’antar Ewekoro.
A cewarsa, kamfanin ya kasance abin koyi wajen gudanar da harkokin kasuwanci cikin nasara, kyakkyawar alaƙa da al’ummomin da yake aiki a cikinsu, da kuma aiwatar da manufofin ci gaba mai ɗorewa.
Shugaban na NGX ya ce HBM Nigeria Plc na daga cikin kamfanonin da aka jera a kasuwar hannayen jari ta Najeriya tsawon shekaru masu yawa, kuma tana cikin rukunin Premium Board, wanda ake warewa ga manyan kamfanoni masu ƙarfi a fannin kasuwanci da cikakken bin ƙa’idojin shugabanci nagari.
Ya ƙara da cewa kamfanin ya cika tare da zarce dukkan sharuddan da ake buƙata domin kasancewa a wannan matsayi, yana mai nuna kwarin gwiwar cewa zai ci gaba da taka muhimmiyar rawa a kasuwar hannayen jari ta ƙasar.
Kwairanga ya bayyana cewa sauye-sauyen mallaka da sunan kamfanin da aka yi a baya sun kasance tare da inganta ayyukansa da gudummawar da yake bayarwa wajen bunƙasa tattalin arzikin Nijeriya.
Ya ce yana sa ran sabon sauyin da aka samu bayan Kamfanin Huaxin Building Materials Group ya zama babban mai hannun jari zai haifar da ƙarin bunƙasar kasuwanci, ƙaruwa a yawan kuɗaɗen shiga, riba mai ɗorewa da kuma ƙarin anfani ga masu hannun jari da sauran masu ruwa da tsaki.
Dangane da ci gaban masana’antu, shugaban na NGX ya yaba da kudurin kamfanin na faɗaɗa ƙarfin samar da siminti a Kamfanin Ashaka Cement da ke Jihar Gombe.
Ya ce wannan wani buri ne da al’ummar Gombe da sauran yankin Arewa maso Gabas suka daɗe suna fata, domin aikin zai taimaka wajen samar da kayan gini cikin sauƙi tare da ƙara samar da guraben ayyukan yi.
Kwairanga ya bayyana farin cikinsa da yadda faɗaɗa Ashaka Cement ya zama ɗaya daga cikin manyan tsare-tsaren HBM Nigeria Plc, yana mai cewa yana sa ran halartar bikin ƙaddamar da sabon ɓangaren da za a faɗaɗa nan gaba.
Ya kuma sake taya kamfanin murnar wannan gagarumin sauyi, tare da yi masa fatan samun nasara da ci gaba a sabon babin da ya buɗe a tarihin kamfanin.
