A jiya Lahadi Iran ta bayyana cewa za ta kai hari kan tashar makamashi da na ruwa na ƙasashen maƙwabta a yankin Gulf, a matsayin martani idan Shugaban Amurka, Donald Trump, ya aiwatar da barazanar da ya yi na kai hari kan tashar wutar lantarki na Iran cikin sa’o’i 48, lamarin da ke ƙara tsananta rikicin da ya shafe makonni uku yana gudana.
Hasashen irin waɗannan hare-hare na ramuwar gayya kan kayayyakin more rayuwa na fararen hula na iya ƙara tsananta rikicin yankin, tare da girgiza kasuwannin duniya lokacin da za su sake buɗewa a safiyar Litinin.
An ji ƙararrawar gargadin hare-haren sama a sassan Isra’ila tun daga farkon safiyar Lahadi, domin sanar da zuwan makamai masu linzami daga Iran, bayan da mutane da dama suka jikkata a daren jiya sakamakon hare-hare biyu daban-daban a garuruwan Arad da Dimona da ke kudancin Isra’ila.
Sojojin Isra’ila sun ce bayan wasu sa’o’i sun fara kai hare-hare kan Tehran a matsayin martani.
Trump ya yi barazanar a daren jiya cewa zai “lalata gaba ɗaya” tashoshin samar da wutar lantarki na Iran idan Tehran ba ta buɗe mashigin ruwan Hormuz gaba ɗaya cikin sa’o’i 48 ba. Wannan na zuwa ne kusan kwana guda bayan ya yi magana kan “rage zafin yaƙin.” Ya kuma yi wannan sabuwar barazana ne a daidai lokacin da dakarun ruwan Amurka da manyan jirage masu sauka cikin ruwa ke kan hanyarsu zuwa yankin.
