Jami’an Rundunar ‘Yan Sandan jihar Gombe sun cafke wasu mutane biyar bisa zargin satar kayayyaki da kuma yunkurin kwacen babur a jihar.
A cewar rundunar, an kama mutum huɗu da ake zargi da haɗa baki wajen satar batura huɗu na solar, kwamfutar HP, decoder na CCTV da wayar Nokia daga ofishin Federal Mortgage Bank da ke GRA, Gombe. An samu nasarar kwato mafi yawan kayayyakin da aka sace yayin da ake ci gaba da neman wani da ya tsere.
Haka kuma, jami’an ‘yan sanda sun kama wani mutum mai suna Muhammad Bello bisa zargin yunkurin kwacen babur a hanyar New GRA zuwa Pen Resource Secondary School. An kwato guduma da ake zargin ya yi amfani da ita da kuma wani babur Boxer.
Kwamishinan ‘Yan Sandan jihar, CP Umar Ahmed Chuso, ya tabbatar da cewa rundunar za ta ci gaba da yaƙi da masu aikata laifuka tare da kare rayuka da dukiyoyin al’umma a jihar.
