Tsohon shugaban ƙasa, Olusegun Obasanjo, ya ziyarci tsohon shugaba na mulkin soja, Janar Ibrahim Badamasi Babangida, a gidansa dake Minna ranar Litinin, yayin da ake ta rade-radin alakarsu da shirye-shiryen siyasa kafin zaben shugaban kasa na 2027.
Rahotanni sun nuna cewa tsofaffin shugabannin biyu sun yi ganawar sirri na tsawon mintuna 30 kafin Obasanjo ya koma filin jirgin sama.
Ganawar ta janyo hasashe a cikin ‘yan siyasa cewa tana da alaka da shirye-shiryen samar da tikitin hadin gwiwa ta Peter Obi da Rabiu Musa Kwankwaso a karkashin ADC, domin kalubalantar tsohon mataimakin shugaban kasa Atiku Abubakar da kuma Shugaba Bola Tinubu a zaben 2027.
Har yanzu Obasanjo da Babangida ba su yi wani bayani kan rade-radin ba, amma ganawar ta Litinin na kara karfafa hasashen ci gaba da shirin siyasa na hadin gwiwar ‘yan takara.
